Kthimi kah qytetari

Nga Muhamet Hajrullahu

12 Maj 2011

Nuk mjafton vetëm një herë në vit të kujtohet a ka liri të shtypit a jo në Kosovë. Nuk mjafton vetëm të ulemi në tryezë e të themi se i kemi punët keq me lirinë e shtypit dhe se vendet në rajon janë më mirë se Kosova. Ne duhet të jemi aktiv gjatë tërë vitit.

Është koha që zëri i gazetarëve të jetë i fuqishëm dhe shumë profesional për të gjithë ata që tentojnë të kërcënojnë, frikësojnë, joshin dhe shantazhojnë gazetarët e lirë, të cilët shkruajnë e raportojnë për tema si korrupsioni, krimi i organizuar, tenderët e bizneset më të ndryshme duke ofruar fakte dhe të vërteta që janë në të mirë të publikut. Është koha që kurdo që një gazetar apo person që punon në media kërcënohet apo sulmohet të marrë një reagim të fuqishëm nga vetë ky komunitet.

Fatkeqësisht, kriza morale që i ka kapluar pjesët tjera të shoqërisë sonë nuk i ka lënë të paprekur edhe gazetarët. Ata janë prodhim i këtij vendi si këta politikanë që i kemi, si këto parti politike, si këta mjekë, profesorë, policë, studentë e nxënës,madje edhe si këta përfaqësues të shoqërisë civile.

Duke marrë parasysh që puna e tyre shihet qartë prej publikut të gjerë, gazetarët për çdo ditë janë nën llupën e shikuesve, lexuesve e dëgjuesve, të cilët përmes punës së gazetarit e shohin se a janë ata me një parti apo tjetër. Si rezultat, publiku me të drejtë po e sheh që jo të gjithë gazetarët janë të mirë dhe profesional dhe jo të gjithë janë në shërbim të informimit të saktë e të paanshëm për qytetarin.

Ka të tillë që shkruajnë e raportojnë edhe për qëllime e agjenda të ndryshme. Prandaj, sot gazetarët duhet të bëjnë çmos që të sigurohen që të mos humbin besimin dhe respektin në punën e shenjtë që e bëjnë.

Ata duhet të qëndrojnë të fortë edhe në kohën kur shantazhohen, joshen e kërcënohen duke rezistuar e duke mos rënë pre e politikave ditore, presioneve që mund të vijnë nga Qeveria, partitë politike, bizneset e grupet e ndryshme të interesit.

Pra, gazetarët duhet me dinjitet ta ruajnë profesionalizmin, kodin etik, mirësjelljen dhe paanshmërinë. Ka ardhur koha kur ne duhet së bashku t’ia arrijmë.

Sot në Kosovë, niveli i gazetarisë nuk është më i kënaqshmi dhe secili nga ne do të kishte dëshirë për ta parë një nivel më të lartë të raportimit, sidomos të gazetarisë hulumtuese. Mirëpo gjithashtu nuk bën të anashkalohet fakti që në Kosovë gazetarët apo gazetaria kanë arritur një nivel më të lartë profesional sesa shumë fusha të tjera në vend.

Ajo që është më brengosëse sot në mediat e Kosovës, është fakti që politika ka arritur të shtrijë dorën mirë në këto media. Madje duke përçarë ato dhe duke kontrolluar ato qoftë përmes reklamave apo edhe përmes pronarëve të tyre. Duke i bërë gazetarët tifozë partishë , me të drejtë publiku po fillon t’i identifikojë mediat që janë të afërta ose me pozitë apo opozitë. Ndërsa është bërë zakon që ato media që nuk i shërbejnë pushtetit klasifikohen nga politika si tradhtarë e shpijuna. Me këtë, politika ka arritur të përdorë sistemin “përçaj e sundo” .

Në vend se mediat dhe gazetarët të merren me raportime hulumtuese dhe të funksionojnë si pushtet i katërt që mbikëqyr pushtetin, ata po merren me njëri- tjetrin, sepse po porositen të sulmojnë kolegët e tyre nga bosët e tyre politik. Kjo po ndikon në humbjen e kredibilitetit dhe respektit ndaj gazetarit dhe medias prej qytetarit të thjeshtë.

Andaj që të mos humbet përfundimisht besimi i publikut në gazetarinë kosovare, ata profesionistë që duan ta ruajnë pavarësinë e tyre duhet të gjejnë mënyra për të dëshmuar pavarësinë redaktoriale shumë më fuqishëm para opinionit.

Shkruaj koment