Gashi: Këshilli i Etikës i UP-së ua ka pamundësuar viktimave të bëjnë ankesë
Kreshnik Gashi, redaktor përgjegjës në KALLXO.com, ka thënë se Këshilli i Etikës i Universitetit të Prishtinës ka dështuar në vendimmarrje, në lidhje me rastin e ngacmimit seksual të raportuar së fundmi në UP.
Profesori i rregullt i Fakultetit të Edukimit në UP, Xhevat Krasniqi, tashmë i dyshuar për ngacmim seksual, është denoncuar nga 27 studente të Fakultetit të Mjekësisë për ngacmim seksual, ku ishte i angazhuar si profesor i lëndës së matematikës.
Më 23.04.2024, Krasniqin e ka pezulluar nga puna rektori i UP-së, Qerim Qerimi pas rekomandimit të Këshillit të Etikës së UP-së që ai të jetë i pezulluar derisa të përfundojnë veprimet hetuese nga ana e Prokurorisë së Shtetit lidhur me denoncimin për ngacmim seksual.
Sipas Gashit, rekomandimi i Këshillit të Etikës të UP-së që rektori i UP-së, Qerim Qerimi ta pezullojë profesorin Krasniqi derisa të përfundojnë veprimet hetuese nga ana e Prokurorisë së Shtetit, ia pamundëson studenteve që e kanë raportuar rastin të ankohen ndaj vendimit të KE-së.
“Këshilli i Etikës ka dështu në vendimmarrje, e çka është më e keqja, është që ia ka pamundësuar viktimave që në gjashtë muajt e ardhshëm me bo ankesë ndaj vendimit të tyre për shkak që se nuk është vendim, nuk është masë, është vetëm çështje procedurale” – ka deklaruar Gashi, në emisionin “Kallxo Pernime”.
Mënyra se si kanë vepruar KE i UP-së ndaj këtij rasti, Gashi konsideron se “kanë vepruar për të blerë kohë në mënyrë që t’i sigurojnë vetës një paqe që deri në fund të gjashtë mujorit KE mos të merret me këtë lëndë, mirëpo ta delegojnë te një institucion tjetër”.
“Është mungesë kompetence për me marr vendim mbi provat të cilat i kanë mbledhë, është mungesë kompetence guximi profesional me trajtu rastin thjeshtë janë t’u pritë një institucion tjetër m’ia dhanë hazer në pjatë edhe ata me marr vendimin, që për mendim timin është gabim. Nëse je anëtar i KE-së, anëtar i një komisioni disiplinor, aty je për me marrë vendime, jo për me shty procedura” – ka thënë Gashi.
Sipas tij, KE është dashur të marrë vendim menjëherë, jo ta dërgojnë rastin në institucion tjetër. Andaj vendimin e UP-së për pezullimin e Krasniqit nga puna, Gashi e konsideron të gabuar, ndërsa tha se ndaj këtij vendimi ka të drejtë të ankohet vetëm Krasniqi.
“KE është dashtë me marrë vendim menjëherë, për shkak se procedura e kërkon që me marr vendim, jo me dërgu te një institucion tjetër. Vajzat kanë vendos m’i besu Këshillit të Etikës në këtë rast edhe ata kanë vendos pa leje të tyre me çu te një insitucion tjetër” – tha ai.
Ai ka ngritur çështjen se a kanë kompetencë KE-ja ta dërgojë rastin në Prokurori.
“A kanë kompetencë KE me dërgu landën në Prokurori, është çështja tjetër e diskutueshme për shkak se vepra penale e ngacimimit seksual ndiqet vetëm sipas propozimit të palëve, pra vetëm sipas propozimit të viktimave kjo vepër mundet m’u ndjekë prej Prokurorisë dhe këtu tash është një dilemë e madhe juridike – a kanë pasë KE me vendos rastin mrena aty apo me bo këtë suspendim edhe m’u mjaftu me elementin që ata po e dërgojnë në Prokurori” – ka shtuar Gashi.
KE vendimin e tyre për pezullimin e Krasniqit nuk e ka publikuar, e as nuk e kanë ndarë me Fakultetin e Edukimit, siç ka thënë dekani i këtij Fakulteti, Blerim Saqipi.
“Vendimi i Këshillit të Etikës (për pezullimin e profesorit Xhevat Krasniqi) ende nuk na është përcjell (në Fakultet të Edukimit), unë si dekan nuk kam vendim, unë kam vendimin e Rektorit. Meqë rasti është denoncuar në një fakultet tjetër edhe instanca e trajtimit të rastit është Këshilli i Etikës, sigurisht për ruajtjen e konfidencialitetit” – ka thënë Saqipi në emisionin “Kallxo Pernime”.
Se pse nuk po e publikojnë vendimin e tyre nga KE, Gashi nuk mendon se është çështje konfidencialiteti, porse sipas tij ideja është që ta testojnë opinionin se sa po e kritikon vendimin e tyre dhe ta plotësojnë vendimin aty ku shohin se ka “vrima” që duhet të mbyllen në mënyrë që të mos kritikohen.
Si përfundim, Gashi ka thënë se UP duhet ta shoh punën e KE-së bazuar në këtë rast.
“UP duhet tash me pa, a duhet me pas një Këshill të Etikës të këtij formati, i cili nuk merr vendime, po i cili pezullon procedura edhe i delegon te një institucion tjetër për m’i kry punët e veta” – tha Gashi.
Ai ka treguar se prokurorja e rastit ndaj Krasniqit është Nebahate Salihu dhe ka thënë se të gjitha palët duhet të shkojnë dhe të dëshmojnë në Prokurori për këtë rast.
Dekani i Fakultetit të Edukimit në UP, Blerim Saqipi ka njoftuar se profesori Xhevat Krasniqi punon në Fakultetin e Edukimit nga vitet 2004-2005, në fushën e matematikës.
Ndërsa, nga Fakulteti i Mjekësisë në një përgjigje për KALLXO.com, më 27.03.2024, kanë thënë se profesori Krasniqi ka qenë i angazhuar në këtë Fakultet përafërsisht nga viti akademik 2016/2017, ku ka ligjëruar lëndën e matematikës në programin e Farmacisë
Denoncimin me shkrim për ngacmimin seksual studentet e Fakultetit të Mjekësisë e kishin dorëzuar zyrtarisht më 27.02.2024 në Fakultet.
Pas denoncimit të studenteve, i gjithë menaxhmenti i Mjekësisë, dekan e prodekan, janë mbledhur më 04.03.2024, me ç’rast kanë ftuar edhe profesorin Krasniqi për t’ia kumtuar me gojë denoncimin e studenteve ndaj tij dhe ndërprerjen e bashkëpunimit me të.
Pas këtij takimi, dekania e Fakultetit të Mjekësisë, Suzana Manxhuka- Kërliu, denoncimin e studenteve e kishte përcjellë me shkresë zyrtare në Këshillin e Etikës të UP.
Këshilli i Etikës së UP-së përbëhet nga katër anëtarë burra: Iset Morina (kryetar), Skender Muji, Arben Hajdari dhe Rrezeart Galica.
Pesë javë pas denoncimit të studenteve ndaj profesorit të Shkencave të Matematikës, Xhevat Krasniqi, për ngacmim seksual, më 04.04.2024 u mblodh Këshilli i Etikës së Universitetit të Prishtinës.
Në këtë mbledhje u paraqit edhe vetë Krasniqi, ani pse me gjithë insistimin e Jeta Xharrës, refuzoi të përgjigjet lidhur me pretendimet ndaj tij.
Më 07.04.2024, “Kallxo Përnime” transmetoi rrëfimet e studenteve dhe studentëve të Mjekësisë në Universitetin e Prishtinës, në lidhje me ngacmimet seksuale që pretendohet t’i ketë bërë profesori i shkencave matematikore, Xhevat Krasniqi.
Përveç këtyre tri studenteve, në Kallxo Përnime më 07.04.2024 rrëfyen edhe 3 djem që kishin qenë dëshmitarë të këtyre ngacmimeve seksuale që u ishin bërë vajzave nga viti 2022.
Pesë ditë pas transmetimit të emisionit të Kallxo Përnime për ngacmimet seksuale në Universitetin e Prishtinës, Prokuroria ka autorizuar organet e rendit që të nisin hetimet.
Kryeprokurori Zejnullah Gashi më 12.04.2024 ka konfirmuar për KALLXO.com se janë intervistuar katër dëshmitarë.
“Prokuroria ka autorizuar policinë për të ndërmarrë hetime pas publikimit. Janë intervistuar katër dëshmitarë dhe intervistat televizive janë vendosur në dosjen e Policisë” – tha kryeprokurori Gashi.
Aktivistë të Lëvizjes Feministe Studentore dhe të tjerë pasi bllokuan hyrjen e Rektoratit të Universitetit të Prishtinës më 11.04.2024, për shkak të protestës së tyre gjithëditore të cilën e kishin paralajmëruar më 10.04.2024, u shpërndanë nga Policia e Kosovës me forcë.
Ekipi i KALLXO.com raportoi nga vendi i ngjarjes se disa aktivistë janë tërhequr zvarrë nga Policia e Kosovës, për të zhbllokuar kështu hyrjen e Rektoratit.
Përderisa mbahej protesta e aktivistëve para Rektoratit të UP-së, më 11.04.2024, studentë të Fakultetit të Inxhinierisë Mekanike të UP-së, e bojkotuan mësimin për një orë.
Përveç tyre, edhe studentët e Mjekësisë, ku u raportua ngacmimi seksual në UP, nuk kanë mbajtur mësim. Këtë e kishte konfirmuar për KALLXO.com vetë Fakulteti i Mjekësisë, i cili nuk i është referuar si “bojkot” mosmbajtjes së procesit mësimor, por u janë referuar “mosvijim”.
Këshilli i Etikës i UP-së mbajti mbledhje për këtë rast, më 17.04.2024, në të cilën dëshmuan u dëgjuan si dëshmitarë tre studentë, dy vajza dhe një djalë.
Mbledhja ishte e hapur për media, mirëpo është kërkuar që për shkak të konfidencialitetit të dëshmitareve që janë duke dëshmuar aktualisht, mediat të mos marrin pamje.
Në këtë mbledhje nuk u mor vendim nga KE ndaj Krasniqit, mirëpo KE pati kërkesa ndaj Fakultetit të Edukimit dhe atij të Mjekësisë.
KE i kërkoi Fakultetit të Mjekësisë që ta ridërgojë edhe njëherë listën e nënshkrimeve të studenteve denoncuese në afat prej një jave pasi që, sipas anëtarëve të këtij Këshilli, profesori Krasniqi pretendon se 9 prej nënshkrimeve janë të falsifikuara.
Ndërsa, Fakultetit të Edukimit i kërkoi vlerësimin zyrtar të performancës së profesorit të rregullt, Xhevat Krasniqi, në këtë Fakultet.
Më 18.04.2024, përderisa profesori Krasniqi po mbante ligjëratë me studentët e Fakultetit të Edukimit, aktivistë të Lëvizjes Feministe Studentore kanë hyrë duke fishkëlluar dhe kanë penguar orën, që ka çuar në largimin e studentëve nga klasa, përderisa Krasniqi ka vazhduar të rrijë në klasë.
Këshilli i Etikës u mblodh më 22.04.2024. Para më se 50 studentëve, Xhevat Krasniqi prapë u ftua për të dhënë intervistë e cila u mbajt e hapur para studentëve.
Iset Morina, kryetar i Këshillit të Etikës ka treguar se ka lejuar studentët në këtë seancë me kusht që s’ka xhirime dhe s’ka zhurmë.
Krasniqi e kishte përgatitur një deklaratë dhe e ka lexuar atë, duke dhënë qëndrimin e tij ndaj shprehjeve të përdorura në ankesën e ish-dekanes së Fakultetit të Mjekësisë, Suzana Manxhuka-Kërliu, e cila e ka deponuar ankesën në KE pas raportimit për ngacmim nga studentet e Mjekësisë.
“Shpreh kundërshtimin tim lidhur me atë që më është atribuuar. Pasi që vlerësimi parimor nuk iu ka shkuar për shtati disa njerëzve, ata i kanë shfrytëzuar të gjitha mundësitë që i kanë pasur ndaj meje” – tha Krasniqi.
Ai tha se i kanë keqpërdorur apo joshur disa studentë për të shpifur ndaj tij.
Akuzën për ngacmim seksual nga studentet Krasniqi e ka quajtur “të pavërtetë” dhe “shpifje”. Shprehjet e paraqitura në ankesat e studenteve ai ka thënë se janë shtrembëruar.
“Ejonë ti gjithë Ejona ki me mbet” – Krasniqi tha se e ka kuptimin për një studente që ka bërë zhurmë gjatë ligjëratës, pra sipas tij, jo siç është kuptuar e raportuar “E jonë, ti gjithë e jona ki me mbet”.
Ai tha se nuk i ka përdorur asnjë nga shprehjet që janë në ankesën e FM-së, në asnjë bisedë me studentët, bisedë formale apo jo formale.
“Shprehja e fjalës masazh është shpifje. Se jam afruar dhe kam dashur ta përqafoj është shpifja e radhës” – ka thënë Krasniqi.
Krasniqi tha se i ka falur pikë në një provim një studente, në këtë rast Krasniqi u pyet nga Këshilli i Etikës se cilat ishin motivet që ia ka falur pikët. Ai u përgjigj se në rastet kur studentët janë afër rezultatit të kalueshmërisë ashtu vepron.
Për një studente tjetër, Krasniqi tha se ajo e ka kërcënuar duke i thënë “hajt se ki me pa ti”.
Rreth nënshkrimeve të studenteve të Mjekësisë në ankesën që ka deponuar Fakulteti i Mjekësisë për raportimin e ngacmimit në Këshillin e Etikës, Xhevat Krasniqi pretendon se nëntë nënshkrime të këtyre studenteve janë të falsifikuara.
“Nënshkrimet e tyre i kam krahasu me listat e nënshkrimeve të studentëve gjatë ligjëratave. Dyshoj se nënshkrimet mund të jenë të falsifikuara” – tha Krasniqi.
Ai pretendon se nënshkrimet e listës së ligjëratave nuk janë të njëjta me nënshkrimet në ankesën e Fakultetit të Mjekësisë.
Iset Morina, kryetar i KE, e ka pyetur, se përderisa ai pretendon se 9 nënshkrime janë të falsifikuara, për 18 nënshkrimet tjera a janë të vërteta?
Krasniqi është përgjigjur duke thënë se “nuk ka vërejtur se ato kanë lëshime”.
Pasi që Këshilli nuk mori vendim në mbledhjen e datës 22.04.2024, aktivistë të Lëvizjes Feministe Studentore kanë bllokuar hyrjen e Admnistratës Qendrore të UP-së, duke mos lejuar daljen nga objekti të anëtarëve të Këshillit.
Pas disa orësh bllokadë nga aktivistët, Policia e Kosovës ka larguar nga salla e Admnistratës profesorin Xhevat Krasniqi dhe dy anëtarët tjerë të Këshilli të Etikës, Arben Hajdarin edhe Skender Mujin.
Pas disa minutave, ata intervenuan sërish duke i larguar nga salla edhe kryetarin e Këshillit të Etikës, Iset Morina edhe anëtarin tjetër Rrezeart Galica që kishin mbetur brenda sallës e së cilëve studentët u thanë se “i ka harruar Policia brenda sallës”.
Më 23.04.2024, aktivistet e Lëvizjes Feministe Studentore kanë bllokuar me ngjitës derën e zyrës së profesorit Xhevat Krasniqi, i denoncuar për ngacmim seksual nga 27 studente të Fakultetit të Mjekësisë në Universitetin e Prishtinës.
Letra me mbishkrimet “Skenë krimi! Mos kalo!”, “ Xhevat Krasniqi nuk ke vend në UP”, janë shkruar në derë zyrës së profesorit Krasniqi dhe në hyrje të zyrës.
Ky aksion ishte vazhdim i protestës së aktivistëve që kërkojnë me ngulm përjashtimin e Krasniqit nga Universiteti i Prishtinës, që kur u bë publik lajmi për denoncimin e studenteve.
