Kurti takohet me deputetin e Këshillit Kombëtar të Zvicrës, Islam Aliaj

Kryeministri i Kosovës, Albin Kurti, ka pritur në takim deputetin e Këshillit Kombëtar të Zvicrës, Islam Aliaj, me të cilin ka biseduar për mundësitë e bashkëpunimit për mbrojtën dhe jetësimin e të drejtave të personave me aftësi të kufizuara.

Sipas njoftimit, Kurti i ka uruar suksese në të gjitha angazhimet e tij, ndërsa i ka ofruar mbështetjen e plotë në kauzën e përbashkët për mundësi të barabarta për të gjithë.

Deputeti Aliaj tregoi për angazhimin e tij në kauzën për të drejtat e personave me aftësi të kufizuara. Ai shprehu vullnetin për të kontribuar edhe në Kosovë.

Kurti ka përmendur punësimin e asistentëve të fëmijëve me nevoja të veçanta.

“Kurti foli për angazhimin e Qeverisë për krijimin e kushteve të përshtatshme dhe gjithëpërfshirje në të gjitha fushat e jetës për personat me aftësi të kufizuar. Ai përmendi një ndër vendimet e vitit të parë të qeverisjes, që ishte shpallja e vitit 2022 ‘Vit i personave me Aftësi te Kufizuara’. Teksa theksoi rëndësinë e gjithëpërfshirjes dhe barazisë në edukim, ai veҫoi punësimin e 250 asistentëve për fëmijë me nevoja të veçanta në shkolla, dhe planet për punësimin e 500 sosh”- ka njoftuar Zyra e Kryeministrit.

Tutje thuhet se në takim u veҫua miratimi i Udhëzimit Administrativ për Listën e llojeve dhe pajisjeve ndihmesë, që ofrohen falas për personat paraplegjikë dhe tetraplegjikë, krahas ndarjes së mjeteve për barnat që ipen falas nga lista esenciale.

“Krahas rritjes së mbështetjes për Komitetin Paralimpik të Kosovës dhe Federatën e Sportit për të Verbër, u potencua edhe mbështetja e veçantë për pjesëmarrjen në Lojërat Paralimpike Paris 2024, ku Republika e Kosovës do të shënojë pjesëmarrjen e parë historike në këto lojëra”- thuhet në njoftim.